ოპერირების პრინციპები

“უჯრედი” – ერთადერთი ადგილი სადაც განთავსებული ნარჩენი თვალისთვის შესამჩნევია

პოლიგონზე ნარჩენების განთავსება ხორციელდება მკაცრი და სისტემატური გეგმის შესაბამისად, რომლის ძირითად ელემენტს სწორედ უჯრედი წარმოადგენს. „უჯრედი“ არის ადგილი, სადაც ხდება ნაგავმზიდიდან ნარჩენების განთავსება, მუხლუხიანი ტექნიკით შეგროვება, სპეციალური კომპაქტორით დაპრესვა და ბოლოს, რეგულარულად ნიადაგის საბოლოო ფენით გადაფარვა. ნარჩენების დღიური მოცულობის მიხედვით, უჯრედი გარკვეულ პერიოდში (50-100 დღე) ივსება (2-3 მეტრის სიმაღლეზე) და ნიადაგის საბოლოო ფენით იფარება. საბოლოოდ მიწით გადაფარული, დახურული უჯრედის მიმდებარედ ხდება ნარჩენების განთავსებისთვის ახალი უჯრედის გამოყოფა, რომელიც ანალოგიური პრინციპით ფუნქციონირებს გარკვეული ვადით.

განთავსებული ნარჩენების ეფექტური დაპრესვა

თანამედროვე პოლიგონის ძირითადი ელემენტია მუდმივი და კარგად დაგეგმილი დაპრესვა. ეს უზრუნველყოფს ნარჩენების ერთიანი, სტაბილური ფენის შექმნას. შედეგად, პოლიგონზე ერთიანი და კონტროლირებადი პირობები ყალიბდება.  

განთავსებული ნარჩენების ყოველდღიური გადაფარვა

ნარჩენების ნიადაგით რეგულარულ გადაფარვას აქვს არსებითი მნიშვნელობა, რათა მინიმუმამდე დავიდეს მოსახლეობის მყუდროების დარღვევის ალბათობა. აღნიშნული პრაქტიკა დანერგილი და გამოცდილია დასავლური ქვეყნების მიერ.

სპეციალური ბადეები ძლიერი ქარის მიერ ნარჩენების გაფანტვის საწინააღმდეგოდ.

საქართველო ქარიანი ქვეყანაა. ქაღალდითა და პლასტმასის ნარჩენებით პოლიგონისა და მიმდებარე ტერიტორიების დანაგვიანების თავიდან ასარიდებლად, საჭიროა იმ ადგილების დაცვა, სადაც ნარჩენები არის განთავსებული.

გაზის შემგროვებელი სისტემა

დაუმუშავებელი საყოფაცხოვრებო ნარჩენი წარმოქმნის მეთანის გაზს, რომელიც ერთ-ერთ მთავარ ფაქტორს წარმოადგენს სათბურის ეფექტის შექმნაში.  ახალ რეგიონულ ნაგავსაყრელებზე ჩამოყალიბდება გაზის შემგროვებელი სისტემა , რომელიც გათბობას ან მცირე ელექტროენერგიას გამოიმუშავებს.